TRA yashauriwa kuweka mazingira rafiki...

TRA yashauriwa kuweka mazingira rafiki...

     

MAMLAKA ya Mapato Tanzania (TRA) mkoani Tanga, imetakiwa kuweka mazingira rafiki ya kibiashara ambayo yatawafanya wafanyabiashara wasiukimbie mkoa huo. Rai hiyo ilitolewa na Mwenyekiti wa Chemba ya Wafanyabiashara wa Viwanda na Kilimo (TCCIA) Mkoa wa Tanga, Paul Bwoki wakati akisoma risala yake kwenye kilele cha maadhimisho ya Siku ya Mlipakodi iliyofanyika jijini hapa. Alisema wafanyabiashara wengi wanadaiwa kuikimbia bandari ya Tanga na kutumia ya Dar es Salaam na Mombasa kutokana na huduma inayotolewa na TRA kwenye bandari hiyo. “Chemba ya Biashara ya Mkoa wa Tanga tunaomba TRA iwe na mazingira rafiki ya kibiashara, sio kunyanyasana, lazima suala la kuheshimiana lipewe kipaumbele na kufahamu kwamba sisi tuna nia moja ya kufanya biashara na kulipa kodi kwa ajili ya maendeleo ya taifa letu,” alisema Bwoki. Mkuu wa Wilaya ya Tanga, Halima Dendegu, ambaye alikuwa akimwakilisha Mkuu wa Mkoa, Luteni mstaafu Chiku Gallawa, aliitaka TRA kuboresha huduma zake ili kuwafanya walipakodi kundelea kulipa kwa hiari. Dendegu alitumia nafasi hiyo kutangaza vita dhidi wanaokwepa kulipa kodi wakitumia bandari bubu na kulikosesha taifa mapato. Meneja wa TRA Mkoa wa Tanga, Nyonge Mahayu, alisema TRA ilishindwa kufikia lengo la makusanyo yake kwa mwaka 2012/2013, lakini makusanyo halisi kwa kulinganisha na mwaka 2011/2012 yameongezeka kwa asilimia 13. Chanzo;Tanzania Daima