CHAUSTA WASHINDWA KUFANYA KAMPENI KALENGA

CHAUSTA WASHINDWA KUFANYA KAMPENI KALENGA

IKIWA zimebaki takribani siku kumi ili kufungwa kampeni za kugombea ubunge katika jimbo la Kalenga, mgombea wa ubunge katika jimbo hilo kupitia Chama cha Haki na Ustawi (CHAUSTA), Richard Minja anatarajia kuzindua kampeni kesho katika kijiji cha Wasa Kata ya Maboga.

Akizungumza na mtandao huu leo kwa njia ya simu, Katibu Mkuu wa CHAUSTA, Mwaka Mgimwa amesema licha ya kuchelewa kuanza kampeni watafanya kazi kubwa ili kuhakikisha wanapata ushindi katika jimbo hilo.

Mgimwa amesema anatoka kwenye vikao vya Bunge maalum la Katiba linalofanyika mjini Dodoma kwa ajili ya uzinduzi wa Kampeni hizo ambapo baada ya uzinduzi watahakikisha wanatafanya kata kwa kata na kijiji kwa kijiji katika muda huo uliobaki.

Tangu kuanza kwa kampeni Februari 19 mwaka huu, Chama hicho kimekuwa kikishindwa kufanya kampeni kwa sababu zilizoelezwa kuwa Mgombea huyo yupo nje ya mji kwa shughuli za kijamii na kushindwa kufuata ratiba kama ilivyo.

Hata hivyo katika ratiba chama hicho kinaonekana kutokuwa na muda mwingi wa kampeni  kulinganisha na vyama vya CCM na Chadema vinavyoonekana kuwa na muda mwingi wa kufanya kampeni.

Kampeni za jimbo la Kalenga kwa  chama cha CHAUSTA  zilitarajiwa kuzinduliwa rasmi tangu February 22 katika kijiji cha kibaoni kata ya Ifunda jimboni humo ambapo tangu ratiba kuanza chama hicho hakijawahi kuonekana kufanya mkutano hata mmoja.

Mtandao huu ulipomtafuta mgombea huyo kwa njia ya simu ili kupata ufafanuzi zaidi juu ya kukwama kwa kampeni katika chama chake amesema hangeweza kuzungumza chochete kwa kuwa yupo nje ya mji.

“Nipeni muda kwa sasa siwezi kuliongelea hilo suala nitawapeni jibu kesho asubuhi. Kampeni zipo nyingi mimi ninafanya  za kimya kimya sio lazima nifanye kampeni na matarumbeta, magari na mziki ndio mjue nafanya kampeni kwasababu kila mtu anatumia staili yake ya kufanya kampeni” amesema Minja.

Hata hivyo alipododoswa zaidi amesema kuwa kutumia hela nyingi kwenye kampeni ni kuwadanganya wananchi kwasababu wao ndio wanashida nyingi na wanahitaji msaada kutoka kwa viongozi hivyo ni bora pesa zitunzwe ili baada ya ushindi zitumike kuwaletea maendeleo wananchi.

Hata hivyo mgombea huyo ametuma ujumbe mfupi kuwa bado yuko nje ya mji na anatarajia kurudi leo kwa ajili ya kuandaa shughuli za uzinduzi wa kesho katika kijiji cha Wasa Kata ya Maboga.